Mia tago komenciĝas per matena marŝado. En la Nacia Parko, proksime de mia ateliero, la vojo por promeni daŭras 1 horon kaj duonon. Dekstre multe da arboj, maldekstre freŝa valo. Dum la marŝado, mi renkontas kolorojn de ĉiu sezono, printempe, subite aperantajn insektojn, sciurojn bruantajn ie tie, fortan krion de la valo kaj tiel plu. El ĉiuj, konstante impresaj por mi estas, ĉefe, siluetoj de la naturaĵoj : tiom diversaj formoj de arboj, branĉoj, floroj, akvofluoj... Se iu demandus al mi, de kie venas la linioj de viaj verkoj, senhezite mi respondus : de la siluetoj de la naturaĵoj !
